މޯލްޑިވްސް ޑިމޮކްރެޓިކް ޕާޓީ (އެމްޑީޕީ) ގެ ތެރޭގައި އެކި ފިކުރުތައް ގިނަވެ އެޕާޓީގެ ލީޑާޝިޕް ތެރޭގައި މައްސަލަތައް ފުނިޖެހި، ހައްލު ނުކުރެވި، އެންމެފަހުން ކުރީގެ ރައީސް އިބްރާހީމް މުޙައްމަދު ސޯލިހަށް ބައިއަތު ހިފައިގެން އެ ޕާޓީތެރޭގައި ކުއްލި ކޮންގްރެސް އެއް ބޭއްވުމަށް މަސައްކަތް ފަށައިފިއެވެ.
އިތުބާރު ހުރި އެމްޑީޕީގެ އިސް ބޭފުޅަކު ވިދާޅުވި ގޮތުގައި އެމްޑީޕީގެ ކުރީގެ ބައެއް މަޖިލިސް މެންބަރުންނާއި ދާއިރާތަކުގެ ރައީސުންނަށް ރިޝްވަތު ދީގެން އިބޫ ބޭނުންވަނީ އެމްޑީޕީގެ ރިޔާސީ ޓިކެޓް އޭނާއަށް ކަށަވަރު ކުރުމަށް ޕާޓީގެ އެތެރޭގައި ކުއްލި ކޮންގްރެސް އެއް ބާއްވާ އެކަން އެގޮތަށް ނިންމެވުމަށެވެ.
ނަން ހާމަ ނުކުރުމަށް އެދި އޭނާ ވިދާޅުވީ، އެކަމަށް އިބޫ ކުރިމަތިލައްވަން މަސައްކަތް ކުރައްވަނީ، އެޕާޓީގެ ކުރީގެ ރައީސް (ރައީސް ނަޝީދު) އަށް އެމްޑިޕީއާއި އަނެއްކާވެސް ގުޅުނު ޑިމޮކްރެޓްސް އިން އައި މެންބަރުންތައް މަސައްކަތް ކުރާތީއެވެ.
އޭނާ ވިދާޅުވި ގޮތުގައި އެމްޑީޕީގެ އެތެރޭގައި މިވަގުތު 4 ފެކްޝަނެއް އެބައޮތެވެ. އެއީ ފެކްޝަން އިބޫ، ޝާހިދު ފެކްޝަން، އާޒިމް ފެކްޝަން އަދި އިތުރު ފެކްޝަނެކެވެ.
"މީގަ މިވާ ގޮތަކީ އިބޫ އަށް އެބަ އިނގޭ ޝިފާޒުމެން ބޭނުންވާނީ އަންނި ގެންނަންކަން ވެރިކަމަށް. އެހެންވެ އިބޫ މި ބޭނުންވަނީ އަންނި އަށް ޓިކެޓް ނުދޭން ކުރެވެން ހުރި ހުރިހާ މަސައްކަތެއް ކުރަން. ކުއްލި ކޮންގްރެސްއެއް ބޭއްވޭތޯ މިބަލަނީ. ރަސްމީ ގޮތުން އަންނިއަށް ތާއީދުކުރާ ފެކްޝަނެއް އަދިއެއް ނެތްކަމަކު އެއީ ސިއްރެއް."
އެމްޑީޕީ އޮތީ މިހާރު ވަރަށް ބޮޑަށް ބައިބައި ވެފައެވެ. ލީޑަރޝިޕްގައި ތިއްބެވި ބޭފުޅުން އެކަކު އަނެކަކާއި އިސްއުފުލާފައި ނުވެސް ބަލައެވެ.
މައްސަލަ ގޯސްވީ މިދިޔަ ރިޔާސީ އިންތިޚާބުގައި އޭރުގެ ރައީސް ސޯލިހު އަތުން އެތައް މިލިޔަނުން ފައިސާ ނެގުމަށްފަހު އެ ފައިސާތައް އެމްޑީޕީގެ އެކްޓިވިސްޓުންނަށް ނުދީ އަމިއްލައަށް އޭރުގެ އެމްޑީޕީގެ މަޖިލިސް މެންބަރުންތައް ބޭނުންކުރުމުގެ ސަބަބުންނާއި ޕާޓިއަށް ލިބުނު ނާކާމިޔާބުގެ ސަބަބުންނެވެ.
އެދުވަސްވަރު ކުރީގެ ރައީސް މުޙައްމަދު ނަޝީދު ވެސް ވަނީ ސޯލިހާ ދެކޮޅަށް ވަރަށް ވަރުގަދައަށް އެންޓި ކެމްޕޭން ކޮށްފައެވެ.
އެމްޑީޕީގެ ވެރިކަމުގައި ލާދީނީ ފިކުރު ކުރިއެރުވުމަށްޓަކައި އެމްޑީއެން ކިޔާ ލާދީނީ ޖަމާޢަތެއް ނެރެ، ކީރިތި ރަސޫލާއަށް ފުރައްސާރަ ކޮށްފައި ވެއެވެ. އިބޫ އަކީ އެމްޑީއެން ގެ އިސް ލީޑަރެއްގެ ގޮތުގައި މަސައްކަތްކުރެއްވި މެންބަރެއްވެސް މެއެވެ.
