ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިރޭ ލިވަޕޫލް ފުޓްބޯޅަ ކުލަބާއި އެކު ދިވެހިރާއްޖޭގެ ފަތުރުވެރިކަން ޕްރޮމޯޓްކުރުމުގެ ކެމްޕޭން ރަސްމީކޮށް އިފްތިތާޙް ކޮށްދެއްވުމަށް ހަމަޖެހިއްޖެއެވެ.
މި އިވެންޓް ދައުލަތުގެ މީޑިއާ ޕީއެސްއެމް ނިއުސް އިންނާއި އަދި އައިސް ނެޓްވޯކުން މިރޭ 23:30 ގައި ލައިވްކޮށް ދައްކާނެއެވެ.
ރައީސް މުޢިއްޒު އިނގިރޭސިވިލާތަށް ވަޑައިގެންނެވީ މިއަދުގެ ވަޤުތެއްގައެވެ.
މިއީ ދިވެހިރާއްޖޭގެ ފަތުރުވެރިކަމުގެ ސިނާޢަތު އިތުރަށް ކުރިއެރުވުމަށް ކުރައްވާ ދަތުރުފުޅެކެވެ. މި ދަތުރުފުޅަކީ މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން ލިވަޕޫލް އެފްސީއާ އެކު ވެފައިވާ އެއްބަސްވުމުގެ ދަށުން ދިވެހިރާއްޖެ "އޮފިޝަލް ޓޫރިސްޓް ޑެސްޓިނޭޝަން ޕާޓްނަރ" އަކަށް ހެދުމާއި ގުޅިގެން ކުރައްވަމުން ގެންދަވާ ދަތުރުފުޅެއްކަން ފާހަގަ ކުރެވެއެވެ.
މި އެއްބަސްވުމުގެ މުއްދަތަކީ ތިން އަހަރާއި ހަ މަހެވެ. މި މުއްދަތުގެ ތެރޭގައި ލިވަޕޫލް އެފްސީގެ އޮފިޝަލް ޑެސްޓިނޭޝަނަކީ ދިވެހިރާއްޖެއެވެ.
އެންފީލްޑްގައި ބާއްވާ މި ކެމްޕޭން ލޯންޗިންގ އިވެންޓަށް ދުނިޔޭގެ މިލިއަނުން ގުނާ ފުޓުބޯޅަ ފޭނުންގެ ސަމާލުކަން ހޯދޭނެކަމަށް ބެލެވެއެވެ. މި އިވެންޓުގައި ބައިވެރިވެވަޑައިގަތުމަށް ޓޫރިޒަމް މިނިސްޓަރ ތާރިޤް އިބްރާހީމް އަދި އެމްއެމްޕީއާރުސީގެ މެނޭޖިންގ ޑިރެކްޓަރ އިބްރާހީމް ޝިއުރީ އާއި ބައެއް ވަޒީރުންނާއި ދައުލަތުގެ އިސް ބޭފުޅުން ވަނީ ލިވަޕޫލަށް ވަޑައިގެންފައެވެ.
ކެމްޕޭން ލޯންޗުކުރެއްވުމުގެ އިތުރުން، ރައީސް ޑރ. މުޢިއްޒު ނިންމަވާފައި ވަނީ އެޤައުމުގައި ތިބި ދިވެހި ދަރިވަރުންނާއި ވެސް ބައްދަލުކުރެއްވުމަށެވެ. މީގެ އިތުރުން، ލިވަޕޫލް އެފްސީގެ އޭއެކްސްއޭ ޓްރެއިނިންގ ސެންޓަރަށް ޒިޔާރަތްކުރައްވައި، ރާއްޖޭގެ ކުޅިވަރު ތަރައްޤީކުރުމުގައި އެއްބާރުލުން ލިބިދާނެ ދާއިރާތައް ބައްލަވައިލައްވާނެއެވެ. އަދި ލީޑްސްއަށް ވަޑައިގެން ޔުނިވަރސިޓީ އޮފިޝަލުންނާއި އެ ސިޓީގެ ބޭފުޅުންނާ ބައްދަލުކުރައްވައި، ދިވެހިރާއްޖެއާއި އިނގިރޭސިވިލާތާ ދެމެދު ތަޢުލީމީ އަދި ޘަޤާފީ ގޮތުން އިތުރަށް ބަދަހި ކުރުމަށް މަޝްވަރާ ވެސް ކުރައްވާނެއެވެ.
