ރާއްޖޭގައި ލިވަޕޫލް ފުޓްބޯޅަ ކްލަބްގެ އެކަޑަމީއެއް ޤާއިމުކުރުމަށް މަޝްވަރާކުރަމުންދާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ ރައްޔިތުންގެ ސުވާލުތަކަށް ޖަވާބުދެއްވުމަށް ކުރިއަށް ގެންދަވާ "ރައްޔިތުންނާ އެކު" ސިލްސިލާ ޕޮޑްކާސްޓްގެ 2 ވަނަ އެޕިސޯޑްގައި ވާހަކަފުޅުދައްކަވަމުންނެވެ.
ދިވެހިރާއްޖޭގެ ފަތުރުވެރިކަން އިސްތިހާރު ކުރުމަށް ކުރިއަށްގެންދާ ކޯ-ބްރޭންޑް ކެމްޕޭން ހަރަކާތަކީ އިނގިރޭސިވިލާތުގެ ލިވަޕޫލް ފުޓްބޯލް ކްލަބް (އެލް.އެފް.ސީ) އާއި މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން (އެމް.އެމް.ޕީ.އާރު.ސީ) / ވިޒިޓް މޯލްޑިވްސް ގުޅިގެން ކުރިއަށްގެންދާ ހަރަކާތެކެވެ.
ލިވަޕޫލް އެފްސީގެ "އޮފިޝަލް ޓޫރިސްޓް ޑެސްޓިނޭޝަން ޕާޓްނަރު"ގެ ގޮތުގައި ދިވެހިރާއްޖެ ހަމަޖައްސައި އެމް.އެމް.ޕީ.އާރު.ސީ/ވިޒިޓް މޯލްޑިވްސް އިން އެކަން ހާމަ ކުރެއްވީ، މިދިޔަ މާރިޗު މަހުގެ 13 ވަނަ ދުވަހު އެވެ.
މިއީ ދިވެހިރާއްޖޭގެ ފަތުރުވެރިކަމުގެ ބްރޭންޑް ވާސިލުވާ މިންވަރު އިތުރުކޮށް، ރާއްޖެއަށް ޒިޔާރަތްކުރުމަށް އިތުރު ފަތުރުވެރިންނަށް ހިތްވަރު ދިނުމުގެ ގޮތުން، ތިން އަހަރާ ހަމަސްދުވަހަށް ކުރިއަށް ގެންދާ، ބައިނަލްއަޤުވާމީ ކެމްޕޭނެއްގެ ފެށުމެވެ.
"ލިވަޕޫލްގެ ފުޓްބޯލް އެކަޑަމީއެއް ރާއްޖޭގައި ހެދުންވެސް މީގައި މި ފުރުޞަތު ހުޅުވާލެވިފައިވަނީ، ނޫނީ އެ އޮޕްޝަން ހިމެނޭ މީގެތެރޭގައި އިނގޭތޯ. އޭގެ މަޝްވަރާތައްވެސް ކުރިއަށްދާނެ." ރައީސް ވިދާޅުވިއެވެ.
ލިވަޕޫލްއާއެކު ހެދި އެއްބަސްވުމުގެ ދަށުން، ލިވަޕޫލް އެވާޓަން/ޑާބިން މެޗްގައި، ދަނޑުގައި ހުންނަ ލެޑް ޕެނަލްތަކުން ރާއްޖޭގެ އިޝްތިހާރުތައް ފުރަތަމަ ފަހަރަށް ދައްކަން ފަށާނެ ކަމަށް ރައީސް ވިދާޅުވިއެވެ. އަދި ލިވަޕޫލްގެ ސޯޝަލް މީޑިއާ ޕްލެޓްފޯމްތަކާއި، ހުރިހާ މާޗެންޑައިޒެއްގައި ރާއްޖެ ދައްކާނެ ކަމަށްވެސް ވިދާޅުވިއެވެ.
