ރާއްޖެއިން ދެ ޤައުމަކަށް ކަނޑައެޅި ނޮން-ރެސިޑެންޓް ސަފީރުންނަށް ރައްޔިތުންގެ މަޖިލީހުން މިއަދު ރުހުންދީފިއެވެ.
ރަޝިއާއާއި މޮރޮކޯއަށް ނޮން-ރެސިޑެންޓް ސަފީރުން ޢައްޔަންކުރަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފޮނުއްވި ނަންތައް މަޖިލީހުގައި އިއްވާފައިވަނީ މިދިޔަ މަހު 24 ގައެވެ.
ރަޝިއާއަށް ކަނޑައަޅާ ނޮން-ރެސިޑެންޓް ސަފީރު ކަމަށް މިހާރު ތުރުކީއަށް ރާއްޖެއިން ކަނޑައަޅުއްވާފައި ހުންނަވާ ސަފީރު ގ. ކަނޑިތޮޅިއާގެ، ލެފްޓެނަންޓް ޖެނެރަލް (ރޓ) ޢަބްދުއްރަޙީމް އަބްދުއްލަތީފް އައްޔަންކުރަން ރައްޔިތުންގެ މަޖިލީހުން ފާސްވީ ވޯޓުގައި ބައިވެރިވެވަޑައިގެންނެވި 65 މެންބަރުންގެ އިއްތިފާޤުންނެވެ.
މީގެ އިތުރުން މޮރޮކޯއަށް ކަނޑައަޅާ ނޮން-ރެސިޑެންޓް ސަފީރު ކަމަށް މިހާރު ސަޢުދީ ޢަރަބިއްޔާއަށް ރާއްޖެއިން ކަނޑައަޅުއްވާފައި ހުންނަވާ ސަފީރު މ. ވެސްޓްސައިޑް، އަހުމަދު ސަރީރު އައްޔަންކުރަން ރައްޔިތުންގެ މަޖިލީހުން ފާސްވީ ވޯޓުގައި ބައިވެރިވެވަޑައިގެންނެވި 64 މެންބަރުންގެ އިއްތިފާޤުންނެވެ.
މިސްރާއި ކުވެއިތަށް ވެސް ރާއްޖެއިން ކަނޑައަޅާ ނޮން-ރެސިޑެންޓް ސަފީރު ކަމަށް ސަރީރު އައްޔަންކުރަން ރައްޔިތުންގެ މަޖިލީހުން މިދިޔަ މަހުގެ 18 ވަނަ ދުވަހު ރުހުން ދީފައިވާކަން ފާހަގަކޮށްލެވެއެވެ.
