ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ އާއި އަދި ޕީޕަލްސް ނޭޝަނަލް ކޮންގްރެސް (ޕީއެންސީ)ގެ ޕާލިމަންޓްރީ ގްރޫޕުގެ ލީޑަރު އިބްރާހީމް ފަލާޙްއާ އެކު މިއަދު ބައްދަލުކުރައްވައިފިއެވެ.
ރައީސުލްޖުމްހޫރިއްޔާގެ އޮފީހުގެ ތަރުޖަމާނު ހީނާ ވަލީދު ވިދާޅުވިގޮތުގައި، މި ބައްދަލުކުރެއްވުމުގައި ރައްޔިތުންގެ މަޖިލީހަށް މި އަހަރުގެ މި ފެށުނު ދައުރުގައި ސަރުކާރުގެ ފަރާތުން ފޮނުއްވަން ހުރި ބިލުތަކާއި ގުޅޭގޮތުން މަޝްވަރާ ކުރެވުނެވެ. އަދި މިފަދަ ބައްދަލުވުންތަކަކީ ރައްޔިތުންގެ މަޖިލީހުގެ ކޮންމެ ދައުރެއްގެ ކުރީކޮޅު ކުރިއަށްގެންދަވާ އާންމު މަޝްވަރާތަކެއްކަން ހީނާ ފާހަގަކުރެއްވިއެވެ.
މި ބައްދަލުވުން ބޭއްވުނީ ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރު ފެށި ތާ ދެ ހަފްތާއެއްހާ ދުވަސް ފަހުންނެވެ. މަޖިލިސް ހުޅުވުނު ޖަލްސާގައި ރައީސުލްޖުމްހޫރިއްޔާ އިއްވެވި ރިޔާސީ ބަޔާނުގައި، މިއަހަރު ރައްޔިތުންގެ މަޖިލީހަށް ހުށަހެޅުމަށް ގަސްދު ކުރައްވާ ގިނަ އަދަދެއްގެ މުހިންމު ބިލުތަކެއްގެ ވާހަކަ ހާމަކުރެއްވިއެވެ.
މީގެ ތެރޭގައި ޤާނޫނުއަސާސީއަށް ގެންނަން ބޭނުންވާ އިސްލާޙުތަކުގެ ތެރެއިން ޖުޑީޝަލް ސަރވިސް ކޮމިޝަން (ޖޭއެސްސީ) އެކުލެވިގެންވާ ގޮތް އިސްލާޙު ކުރުމާއި، ރައްޔިތުންގެ މަޖިލީހުގެ މެންބަރުންގެ އަދަދު ކަނޑައަޅާ ގޮތް ބަދަލުކުރުން ހިމެނެއެވެ. މީގެ އިތުރުން، ބޯހިޔާވަހިކަމުގެ މައްސަލައަށް ޙައްލު ހޯދުމަށް އަމާޒު ކޮށްގެން ބިމުގެ ބިލާއި، ރިއަލް އެސްޓޭޓް ވިޔަފާރީގެ ބިލު އަދި ބޯހިޔާވަހިކަމުގެ ބިލު ހުށަހެޅުމަށް ވެސް ވަނީ ރޭވިފައެވެ.
ކޮރަޕްޝަން ހުއްޓުވުމަށް އަމާޒުކޮށްގެން އެންޓި ކޮރަޕްޝަންގެ ޤާނޫނަށާއި ޤާނޫނުލް އުޤޫބާތާއި ޖިނާއީ އިޖުރާއާތުގެ ޤާނޫނަށް އިސްލާޙުތަކެއް ގެނައުމަށް ވެސް ރައީސުލްޖުމްހޫރިއްޔާ ވަނީ ވިދާޅުވެފައެވެ. އަދި ދައުލަތުގެ އެސެޓްތައް އަނބުރާ ހޯދުމަށް އެސެޓް ރިކަވަރީއާއި ބެހޭ ބިލެއް ވެސް ހުށަހެޅުމަށް ވަނީ ރޭވިފައެވެ.
މި ބައްދަލުވުމަކީ ސަރުކާރާއި ރައްޔިތުންގެ މަޖިލީހާއި ދެމެދު އޮންނަ ގުޅުން ބަދަހިކޮށް، ރައްޔިތުންނަށް ބޭނުންވާ ޤާނޫނީ އޮނިގަނޑު ހަރުދަނާ ކުރުމަށް އެޅޭ މުހިންމު ފިޔަވަޅެއް ކަމުގައި ބެލެވެއެވެ. މި ބައްދަލުވުމުގައި މަޝްވަރާކުރެވުނު ބިލުތަކުގެ ތެރޭގައި، މޯލްޑިވްސް އިންޓަރނޭޝަނަލް ފައިނޭންޝަލް ސަރވިސަސް އޮތޯރިޓީގެ ބިލު، ދިވެހި ބަހަށް އިސްކަންދިނުމުގެ ޤާނޫނަށް އިޞްލާޙު ގެނައުމުގެ ބިލު، އަދި ޤައުމީ ތަރައްޤީގެ 20 އަހަރުގެ ޕްލޭނާއި ބެހޭ ޚާއްޞަ ޤާނޫނެއް ވުޖޫދު ކުރުމުގެ ބިލު ހިމެނެއެވެ.
މީގެއިތުރުން، ވަޒީފާއާބެހޭ ޤާނޫނާއި ލާމަރުކަޒީ ޤާނޫނަށް އިސްލާޙު ގެނައުމަށް ބިލުތަކެއް ހުށަހެޅުމަށް ވެސް ވަނީ ރޭވިފައެވެ. މި ހުރިހާ ބިލުތަކަކީ ވެސް ރާއްޖޭގެ އިޖްތިމާޢީ، އިޤްތިޞާދީ އަދި ސިޔާސީ ދާއިރާތަކަށް ފާހަގަކުރެވޭ ބަދަލުތަކެއް ގެނެވިދާނެ މުހިންމު ބިލުތަކެކެވެ.
