ޤާނޫނު އަސާސީގެ ދަށުން ކޮންމެ ރައްޔިތަކަށްމެ ލިބިދޭ ހައްޤެއް އޭގެ އެންމެ ފުރިހަމަ މިނުގައި ލިބިދީފައި އޮތުން ސަރުކާރުން މިއަދާއި ހަމައަށް ތަންފީޒު ކުރައްވާފައިވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ ހއ. އަތޮޅުގެ ރަށްތަކަށް ކުރައްވާ ދަތުރުފުޅެއްގައި މިއަދު ތަކަންދޫއަށް ވަޑައިގެން އެރަށުގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ.
ރައީސް ވިދާޅުވީ ކޮންމެ ރައްޔިތަކީ ވެސް ޤާނޫނުން މަނާ ނުވާ ކޮންމެ ކަމެއް ކުރުމުގެ ހައްޤު ލިބިގެންވާ ރައްޔިތެއް ކަމަށެވެ. އަދި ސަރުކާރު އޮތީ ޤާނޫނުގައި ބަޔާންކޮށްފައިވާ ކަންކަން ކުރުމުގައި ކަމަށް ވިދާޅުވިއެވެ. އެމަނިކުފާނުގެ ސަރުކާރު އަބަދުވެސް ދެމި އޮންނާނީ އެގޮތުގައި ކަމަށާއި، ހުރިހާ ރައްޔިތުންނަކީ ވެސް މާތްﷲ ދެއްވި ބުއްދީގެ ބޭނުން ހިފާ ބަޔަކަށް ވާންޖެހޭކަމަށް ރައީސް ފާހަގަކުރެއްވިއެވެ.
ރަށުގެ ތަރައްޤީއާއި ގުޅޭގޮތުން ރައީސް އެދިވަޑައިގަތީ ހުރިހާ ރައްޔިތުން ވެސް އެކުގައި ކުރިޔަށް ދިއުމަށެވެ. އަދި ރަށުގެ ތަރައްޤީއަށްޓަކައި ކުރާ ކޮންމެ ކަމަކީ އެ ރަށަކުން ގެންދެވޭނެ އެއްޗެއް ނޫން ކަމަށާއި ސިޔާސީ ކޮންމެ ފިކުރެއްގެ މީހެއް ކަމުގައި ވިޔަސް އެކަމުގެ ފައިދާ އޮތީ ރަށުގެ ރައްޔިތުންނަށް ކަމަށް ރައީސް ވިދާޅުވިއެވެ.
މީގެ އިތުރުން ރައީސް ވިދާޅުވީ ހުރިހާ ރައްޔިތުންނަކީ ވެސް ހަމަހަމަ ބައެއްކަމަށާއި، ސަރުކާރުން ދޭ އެއްވެސް ޚިދުމަތެއްގައި ތަފާތު ކުރުމެއް ނޯންނާނެ ކަމަށެވެ. އަދި ތަފާތު ހިޔާލުތަކަށް އަބަދުވެސް ޖާގަ އޮންނާނެކަން ފާހަގަކުރައްވައި، އެފަދަ ކަންކަން އަޚުލާގާއި ވަކި ހުދޫދެއްގެ ތެރޭގައި ބެހެއްޓެވުމަށް އެދިވަޑައިގެންނެވިއެވެ.
ރައީސް އިތުރަށް ވިދާޅުވީ ސަރުކާރުން ބަދަލު ހިފުމުގެ އެއްވެސް ރޫހެއް ގެންގުޅެފައި ނުވާނެ ކަމަށާއި ޤައުމަށް ބޭނުން ވަނީ ހަމަޖެހުމާއި އަމާންކަން ކަމަށެވެ. އަދި ސިޔާސީ ގޮތުން އަނިޔާވެރިވި މަންޒަރު ސަރުކާރުގެ މިދިޔަ އެއް އަހަރުގެ ތެރޭގައި ފެނިފައި ނުވާނެ ކަމަށާއި ކުރިޔަށް އޮތް ތަނުގައި ވެސް އެކަން އެގޮތުގައި ދަމަހައްޓާނެކަމަށް ރައީސް ވިދާޅުވިއެވެ.
ރައީސް އިތުރަށް ފާހަގަކުރެއްވީ 2025 ވަނަ އަހަރަކީ ރައްޔިތުން އެދޭ ބަދަލު ފެންނަ އަހަރަކަށް ވެގެންދާނެ ކަމަށެވެ. އަދި ނިމިދިޔަ އަހަރު ސަރުކާރު ހިންގުމުގައި ދިމާވި ބައެއް ދަތިތައް ފާހަގަކުރައްވައި، އެ ދަތިތައް ޙައްލުކުރުމަށް މަސައްކަތް ކުރައްވަމުންދާ ކަމަށް ވިދާޅުވިއެވެ.
