އިދިކޮޅު އެމްޑީޕީން މިރޭ އެ ޕާޓީގެ ޤައުމީ މަޖިލީހުގެ ސިއްރު ބައްދަލުވުމެއް ބޭއްވުމަށް ތައްޔާރުވެއްޖެއެވެ. މިރޭ 21:00 ގައި ބޭއްވުމަށް ހަމަޖެހިފައިވާ މި ބައްދަލުވުމަކީ އެ ޕާޓީގެ ޤައުމީ މަޖިލިސް މެންބަރުންނަށް އެކަނި ވަދެވޭ ގޮތަށް ސިއްރުކޮށް ކުރިއަށްގެންދާ ބައްދަލުވުމެކެވެ..
އެނގިފައިވާ ގޮތުގައި، މި ބައްދަލުވުން ބޭއްވުމަށް ނިންމާފައިވަނީ 2023 ވަނަ އަހަރުގެ ރިޔާސީ އިންތިޚާބާއި އޭގެ ފަހުން އޮތް ރައްޔިތުންގެ މަޖިލިސް އިންތިޚާބުގައި އެ ޕާޓީއަށް ލިބުނު ނާކާމިޔާބީއާއި ގުޅޭ ރިޕޯޓު އެކުލަވާލައި ނިމިފައިވާތީއެވެ. މި ރިޕޯޓަށް ބިނާކޮށް އެ ޕާޓީގެ މަސައްކަތްތަކާއި ގުޅޭ މަގުޗާޓެއް އެކުލަވާލައި، އެ ޕާޓީގެ ހިންގުމަށް ބަދަލުތަކެއް ގެނައުމަށް ވަނީ ނިންމާފައެވެ.
2023 ގެ ރިޔާސީ އިންތިޚާބާއި 2024 ގެ މަޖިލިސް އިންތިޚާބަށް ފަހު، ދެން އެންމެ އަވަހަށް އޮންނާނީ 2026 ވަނަ އަހަރުގެ ލޯކަލް ކައުންސިލްތަކުގެ އިންތިޚާބެވެ. އެމްޑީޕީން މި ބައްދަލުވުމުގައި އެ އިންތިޚާބަށް ތައްޔާރުވުމުގެ މަސައްކަތްތަކާއި ގުޅޭގޮތުން ވެސް މަޝްވަރާކުރަން ނިންމާފައިވާކަމަށް މަޢުލޫމާތު ލިބިފައިވެއެވެ.
އެމްޑީޕީން މިހާރުގެ ވެރިކަމުގެ ހިންގުންތެރިކަމަށް ހުރަސްއެޅުމުގެ ޢަމަލުތަކެއް ހިންގަމުންދާކަމަށް ބައެއް ފަރާތްތަކުން ތުހުމަތުކުރެއެވެ. މިގޮތުން ސަރުކާރުގެ އިސް ފަރާތްތަކުގެ ދަތުރުފުޅުތަކަށް ހުރަސްއެޅުމުގެ ޢަމަލުތަކެއް ހިންގާފައި ވެސް ވެއެވެ. ނަމަވެސް އެމްޑީޕީގެ އެފަދަ ޢަމަލުތަކަށް ރައްޔިތުންގެ ތާއީދެއް ނުލިބުނުކަން ފާހަގަ ކުރެވެއެވެ.
