ދެއްވަދޫއަކީ ރައީސް ޑރ. މުޙައްމަދު މުޢިއްޒުގެ އުފަން ރަށް ފިޔަވައި އެންމެ ބޮޑެތި މަދަދުގާރުން ތިބި ރަށް ކަމަށާއި، އެއީ ރައީސްގެ ދެވަނަ ރަށް ކަމަށް ގެމަނަފުށީ ދާއިރާގެ މެންބަރު އަސަދުﷲ ވިދާޅުވެއްޖއެވެ
މިއަދު ރައީސް މުޙައްމަދު މުޢިއްޒު ދެއްވަދޫއަށް ކުރެއްވި ދަތުރުފުޅުގައި ބޭއްވުނު ޖަލްސާގައި ވާހަކަފުޅު ދައްކަވަމުން މެންބަރު އަސަދު ވިދާޅުވީ، މި ސަރުކާރުން ތަރައްޤީގެ ދުވެލީގައި ދެއްވަދޫ މުޅިން އާ ނާރެހަކަށް ގެންގޮސްދޭނެކަމީ ދެއްވަދޫ ރައްޔިތުން ޝައްކުކުރާނެ ކަމެއް ނޫން ކަމަށެވެ. "އެއީ އަޅުގަނޑުމެންނަށް މުޖައްރިބު ކަމެއް" އަސަދު ވިދާޅުވިއެވެ.
ދެއްވަދޫގެ ތަރައްޤީއާ ގުޅޭގޮތުން އިތުރަށް ވާހަކަފުޅު ދައްކަވަމުން މެންބަރު އަސަދު ވިދާޅުވީ، ދެއްވަދޫއިން ބޭނުންވަނީ ވަށައިޖެހޭ ހައްލެއް ކަމަށެވެ. އޭގެތެރޭގައި 5 ހެކްޓަރާއި 7 ހެކްޓަރަށް ދެއްވަދޫ ބޮޑުކުރުމުގެ ފުރުޞަތު އޮތް ކަމަށާއި، މިހާރުގެ ބަނދަރުގެ ޕްލޭނަށް ކުޑަ ބަދަލެއް ގެނެސް މި ވަށައިޖެހޭ ހައްލު ގެނެސްދެވޭނެ ކަމަށް ޢިއްޒަތްތެރި މެންބަރު ވިދާޅުވިއެވެ.
ދެއްވަދޫއަކީ ސެންޓްރަލް ހުވަދޫގައިވާ ރަށެއް ކަމަށް ވުމުން، ގއ. މާދިގުވަރުގައި އެއަރޕޯޓެއް އެޅުމަށް ދެއްވަދޫ ރައްޔިތުން ބޭނުންވާ ކަމަށާއި، އޭރުން ކޮލަމާފުއްޓާއި ދެއްވަދޫއަށް އެއް ޑިސްޓެންސެއް ލިބޭނެ ކަމަށްވެސް މެންބަރު އަސަދު ވިދާޅުވިއެވެ. އަދި އެ އެއަރޕޯޓަކާއެކު ވަށައިގެންވާ ފަޅުރަށްތައް ރިސޯޓުތަކަށް ހެދުމަކީ ދުރުރާސްތާ ތަސައްވުރެއް ކަމަށް ވިދާޅުވެ، މިކަމަށް މި 5 އަހަރުގެ ޒަޢާމަތުގައި ކުލަޖައްސަވައިދެއްވުމަށް އަސަދު ވަނީ އެދިވަޑައިގެންފައެވެ.
