ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ހުވަދޫ އަތޮޅަށް ކުރައްވާ ރަސްމީ ދަތުރުފުޅުގެ އެންމެ ފަހު ރަށަކަަށް ވަޑައިގަންވާނީ ގއ. ދެއްވަދޫއަށެވެ.
ދެއްވަދޫއަށް ވަޑައިގެންނެވުމުގެ ކުރިން އެމަނިކުފާނު ވަނީ އެއަތޮޅު ކަނޑުހުޅުދޫ، ނިލަންދޫ އަދި މާމެންދޫއަށް ވަޑައިގެންފައެވެ.
ދެއްވަދޫ އަކީ ހުވަދޫ އަތޮޅުގެ މެދުގައި ވަކީން އޮންނަ ކުޑަކުޑަ އެހެންނަމަވެސް ވިޔަފާރީގެ ދާއިރާގައި ރާއްޖޭގެ އެންމެ ކުރީ ސަފުގައި ގުނާލެވޭ ރަށެކެވެ.
ގއ. ދެއްވަދޫ އަށް ނިސްބަތްވާ ފާހަގަކޮށްލެވޭ ބައެއް ވިޔަފާރިތައް:
- ރިސޯޓް އޯނަރުން
- ސަފާރީ އޯނަރުން
- އެސްލޯނު ހޮޅި އުފައްދާ ކާރުޚާނާ
- ތިމާވެށްޓާއި ރައްޓެހި ކޮތަޅު އުފައްދާ ކާރުޚާނާ
- ރިއަލް އެސްޓޭޓް ވިޔަފާރި
- ބޯފެން އުފެއްދުން
މީގެ އިތުރަށް ވެސް ދެއްވަދޫ އަކީ މުޅި ރާއްޖޭގައި ވެސް އާބާދީގެ ނިސްބަތުން އެންމެ މަސްވެރި ބޮޑެތި ފައިބަރު އުޅަނދުތައް އެންމެ ގިނަ ރަށެވެ.
ދެއްވަދޫ އަށް ކުރައްވާ ދަތުރުފުޅުގައި ގެމަނަފުށީ ދާއިރާގެ ޢިއްޒަތްތެރި މެންބަރު އަސަދުﷲ ޝިހާބު، އެރަށަށް ނިސްބަތްވާ ވަޒީރު އަސްވާޑާއި އެސްޓީއޯގެ އެމްޑީ ޝިމާދު އިބްރާހީމްގެ އިތުރުން ހުޅުމާލޭ މެދު ދާއިރާގެ އިއްޒަތްތެރި މެންބަރު އަބްދުﷲ ޝަޒީމް ވެސް ބައިވެރިވެވަޑައިގަންނަވާނެ އެވެ.
ރައީސުލްޖުމްހޫރިއްޔާ ހުވަދުއަތޮޅަށް ކުރައްވާ މި ދަތުރުފުޅަކީ ރާއްޖޭގެ ހުރިހާ އަތޮޅަކަށް ޒިޔާރަތްކުރެއްވުމަށާއި އަތޮޅު، ރަށު އަދި ސިޓީ ކައުންސިލުތަކާއި ބައްދަލުކުރެއްވުމަށް މިދިޔަ އަހަރު ފަށްޓަވައިގެން ކުރިއަށްގެންދަވާ ސިލްސިލާ ދަތުރުފުޅުތަކުގެ ތެރޭގައި ހިމެނޭ ދަތުރުފުޅެކެވެ.
