ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުވަދު އަތޮޅަށް ކުރައްވަމުން ގެންދަވާ ދަތުރުފުޅުގެ ފަހު ރަށެއްގެ ގޮތުން މިއަދު ގއ. ދެއްވަދޫއަށް ވަޑައިގެންފިއެވެ. ދެއްވަދޫއަށް ރައީސުލްޖުމްހޫރިއްޔާ ވަޑައިގަތުމުން އެ ރަށުގެ ރައްޔިތުން އެމަނިކުފާނަށް މަރުޙަބާ ކިޔާފައިވަނީ ވަރަށް ތަފާތު މޮޅު ގޮތަކަށެވެ. ތާރީޚުގައި ރާއްޖޭގެ އެއްވެސް ރަށަކުން އެފަދަ މޮޅު ގޮތަކަށް އެއްވެސް ރައީސަކަށް މަރުޙަބާ ދަންނަވާފައި ނުވާކަން ފާހަގަ ކުރެވެއެވެ.
ދެއްވަދޫއަށް ވަޑައިގެން އެރަށު ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިތުރުން އެ ރަށުގެ ރައްޔިތުންނާއި ބައްދަލުކުރެއްވުމަށް ވަނީ ހަމަޖެހިފައެވެ. ދެއްވަދޫއަކީ ހުވަދުއަތޮޅަށް ރައީސުލްޖުމްހޫރިއްޔާ ކުރައްވަމުން ގެންދަވާ ދަތުރުފުޅުގެ ފަހު ރަށެވެ.
ރައީސް ދެއްވަދޫއަށް ވަޑައިގަތުން/ ފޮޓޯ: ރައީސް އޮފީސް
ރައީސްގެ މި ދަތުރުފުޅުގައި ދެއްވަދޫ ހިމެނޭހެން ހުވަދު އަތޮޅުގެ 8 ރަށަކަށް ވަނީ ވަޑައިގަންނަވާފައެވެ. މި ދަތުރުފުޅުގައި ރައީސުލްޖުމްހޫރިއްޔާ ވަޑައިގެންނެވި ރަށްތަކުގެ ތެރޭގައި ގދ. ނަޑެއްލާ، ގދ. ވާދޫ، ގދ. ފިޔޯރީ، ގދ. ރަތަފަންދޫ، ގއ. ކަނޑުހުޅުދޫ، ގއ. ނިލަންދޫ އަދި ގއ. މާމެންދޫ ހިމެނެއެވެ.
ރައީސުލްޖުމްހޫރިއްޔާ ހުވަދުއަތޮޅަށް ކުރައްވާ މި ދަތުރުފުޅަކީ ރާއްޖޭގެ ހުރިހާ އަތޮޅަކަށް ޒިޔާރަތްކުރެއްވުމަށާއި އަތޮޅު، ރަށު އަދި ސިޓީ ކައުންސިލުތަކާއި ބައްދަލުކުރެއްވުމަށް މިދިޔަ އަހަރު ފަށްޓަވައިގެން ކުރިއަށްގެންދަވާ ސިލްސިލާ ދަތުރުފުޅުތަކުގެ ތެރޭގައި ހިމެނޭ ދަތުރުފުޅެކެވެ. މި ދަތުރުފުޅުތަކުގެ މައިގަނޑު މަޤްޞަދަކީ ރަށްރަށުގެ ތަރައްޤީގެ މަޝްރޫޢުތަކާއި ރައްޔިތުންގެ ކަންބޮޑުވުންތައް ސީދާ ރައްޔިތުންގެ ފަރާތުން އަޑުއެއްސެވުމެވެ.
