ހިންމަފުށީ ކައުންސިލްގެ މެމްބަރެއް ކަމަށްވާ ވަފިއްޔާ އިބްރާހިމް މިއަދު ހަވީރުގެ ވަގުތެއްގައި ކައުންސިލް އިދާރާގައި ކޮމްޕިއުޓަރެއް ސަލާމަތް ކުރަން އުޅުމުގެ ތެރޭގައި ކަރަންޓު ޖެހުމުން އިތުރު ފަރުވާއަށް މާލެ ގެނެސްފި އެވެ.
ކައުންސިލްގެ މެންބަރަކު ބުނި ގޮތުގައި މި ހާދިސާ ހިނގިއިރު ކައުންސިލްގެ ހަމައެކަނި އަންހެން މެންބަރު ވަފިއްޔާ އުޅުއްވީ ކޮމްޕިއުޓަރު ގުޅާފައިވާ ކަރަންޓު ބޯޑުން ޓޮޕް ނައްޓާލުމަށެވެ. ނަމަވެސް، ވެހެމުން ދިޔަ ވާރޭގެ ސަބަބުން ތެމިފައި އޮތުމުން އެވަގުތު އޭނާގެ އަތުގައި ފެން ހުއްޓެވެ.
"ނަސީބަކުން ކަރަންޓް ސްވިޗް ނިވިފައި އޮތުމުން، ހާދިސާ އިތުރަށް ގޯސް ނުވުން އެކަށީގެންވާ،" ކައުންސިލް މެންބަރަކު ވިދާޅުވި އެވެ.
ވަފިއްޔާއަށް ފުރަތަމަ ފަސްޓް އެއިޑް ލިބުނު ނަމަވެސް ކުއްލި ޝޮކެއް ލިބުމުން އިތުރު ފަރުވާއަށް މާލެ ބަދަލުކުރީ މިރޭ އެވެ.
މުޅި ރާއްޖެއަށް ކުރަމުންދާ ވިއްސާރައިގައި އެރަށަށް ވެސް މެދުކެނޑުމެއްނެތި ކުރަމުންދާ ވިއްސާރައިގެ ސަބަބުން ވަރަށް ބޮޑަށް ފެންބޮޑުވެ، ގެދޮރާއި ހިދުމަތްތަކަށް އަސަރުކޮށްފައި ވެއެވެ.
"ބައެއް ގެތަކުގައި ކަރަންޓް ނެތް،" ކައުންސިލްގެ އޮފިޝަލް ފާހަގަކުރައްވައި، ފެންބޮޑުވުމުގެ ސަބަބުން ރައްޔިތުންނަށް ބޮޑެތި ދަތިތަކެއް ކުރިމަތިވެފައިވާ ކަމަށް ވެސް ވިދާޅުވި އެވެ.
