ބުރާސްފަތި ދުވަހުގެ ރޭ ދަންވަރު 1:50 ހާއިރު ހުޅުމާލެ ފޭސް-2 ގެ ގުލްއަލާމަގުން އިރުން ހުޅަނގަށް ނިރޮޅު މަގު ހުރަސްކުރަމުންދިޔަ ފުލުހުންގެ އުޅަނދެއްގައި، ނިރޮޅު މަގުން އުތުރުން ދެކުނަށް ބާރު ދުވެލީގައި ދުއްވާފައި އައި ސައިކަލެއް ޖެހިގެން ހިނގި ނުރައްކާތެރި އެކްސިޑެންޓުގައި ފުލުހުންގެ އިހުމާލެއް އޮތްތޯ ބެލުމަށް ފުލުހުން ތަހުގީގު ފަށައިފިއެވެ.
މި އެކްސިޑެންޓުގައި ސައިކަލު ދުއްވި 18 އަހަރުގެ ޒުވާނާއަށް ބޮޑެތި އަނިޔާތަކެއް ލިބިފައިވާއިރު ރޭގައި އެ ޒުވާނާއަށް ވަނީ ހުޅުމާލޭ ހޮސްޕިޓަލުގައި ފަރުވާ ދިނުމަށްފަހު، ހާލު ގޯސްވެ އައިޖީއެމް ހޮސްޕިޓަލަށް ބަދަލުކޮށްފައެވެ. މިވަގުތު އެ ޒުވާނާއަށް ފަރުވާދެމުން ދަނީ ވެންޓިލޭޓަރުގައި ކަމަށް އެ ހޮސްޕިޓަލުން މައުލޫމާތު ދީފައިވެއެވެ.
🚨 ހުޅުމާލެ ފޭސް-2 ގައި ފުލުހުންގެ ވެހިކަލަކާއި ޗުޕިޓަރ ސައިކަލެއް ޖެހި ނުރައްކާތެރި އެކްސިޑެންޓެއް ހިނގައިފި. pic.twitter.com/spJvYqMEQP
— Khulaasaa (@KhulaasaaNews) December 26, 2024
?t=Dh_XdrFg7BCfBjWk34gwZw&s=19
ފުލުހުން ބުނި ގޮތުގައި ސައިކަލު ދުއްވި ޒުވާނާއަކީ އެއްގަމު ދަތުރު ފަތުރުކުރުމުގެ ޤާނޫނާ ޚިލާފުވެގެން 2024 ވަނަ އަހަރު ޑިސެންބަރު 21 ވަނަ އަހަރު ލައިސަންސް ހިފަހައްޓާފައިވާ މީހެކެވެ.
މިފަދަ އެކްސިޑެންޓުތައް ހިނގުމަކީ ދިވެހި ފުލުހުންގެ ޚިދުމަތުން ނުހަނު ކަންބޮޑުވާކަމެއް ކަމަށް އެ އިދާރާއިން އާންމުކުރި ބަޔާނުގައި ބުނެފައިވެއެވެ. އަދި އެފަދަ އެކްސިޑެންޓުތައް ހުއްޓުވުމަށް މަގުމަތީގެ ރައްކާތެރިކަން ކަށަވަރުކުރުމަށް ގިނަގުނަ ވަސީލަތްތަކެއް ބޭނުންކޮށްގެން ގިނަ މަސައްކަތްތަކެއް ކުރަމުންދާ ކަމަށްވެސް އެ އިދާރާއިން ފާހަގަކޮށްފައިވެއެވެ.
ފުލުހުން އިތުރަށް ބުނެފައިވަނީ މި އެކްސިޑެންޓުގައި ފުލުހުންގެ އުޅަނދު ދުއްވި ފުލުސް އޮފިސަރުގެ އިހުމާލެއް އޮތްތޯ ބެލުމަށް އެ އިދާރާއިން ދަނީ ތަހުގީގު ކުރަމުންނެވެ. އަދި މިފަދަ އެކްސިޑެންޓުތައް ތަކުރާރުވިޔަ ނުދިނުމަށްޓަކައި އަޅަންޖެހޭ އެންމެހާ ފިޔަވަޅުތައް އަޅުއްވާނެ ކަމުގެ ޔަޤީންކަން އެ އިދާރާއިން ވަނީ ދީފައެވެ.
