އަބަދުވެސް ބަލަނީ އެތުލީޓުންނަށް އެންމެ ރަނގަޅު ގޮތް - ކުޅިވަރު ވަޒީރު

ހުސައިން އިސްމާއިލް | 67 ދުވަސް ކުރިން - 11:00
ޚުލާސާ

ކުޅިވަރު ކުޅުންތެރިންގެ މެޑިކަލް އަދި އިންޝުއަރެންސްގެ ކަންކަމާއި ގުޅޭގޮތުން ކުޅިވަރުގެ ދާއިރާގެ ބޭފުޅުންނާއެކު މަޝްވަރާކުރައްވާފައިވާ ކަމަށާއި، ކުޅިވަރުގެ ދާއިރާގައި ހުރި މައްސަލަތައް ހައްލުކުރުމަށް އެންމެނާއެކު ވަރަށް ގާތުން މަސައްކަތްކުރައްވަމުން ގެންދަވާ ކަމަށް ވަޒީރު ވިދާޅުވި.

އަބަދުވެސް ބަލަނީ އެތުލީޓުންގެ ބޫޓަށް އަރައިގެން ނުވަތަ އެތުލީޓުންނަށް އެންމެ ބޭނުންވާ ހުރިހާ ކަމެއް އެންމެ ފުރިހަމަޔަށް ކޮށްދިނުމަށް ކަމަށާއި، ކުޅިވަރު ދާއިރާގައި ކުރަން ހުރި ވަރަށް ގިނަ ކަންކަން އެބަހުރި ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު އަބްދުﷲ ރާފިއު ވިދާޅުވެއްޖެއެވެ.

ދައުލަތުގެ މީޑިއާގައި ވާހަކަފުޅު ދައްކަވަމުން ވަޒީރު ވިދާޅުވީ، ކުޅިވަރު ދާއިރާގައި އޭނާ ބޮޑަށް މަސައްކަތް ކުރެއްވީ ފަންނީ ރޮނގުން ކަމަށެވެ. އެގޮތުން، ކުޅިވަރުގެ ނިޒާމެއް އޮތުމާއި، މޮޅެތި ކުޅުންތެރިން އުފެއްދުމާއި، އެ ކުޅުންތެރިންނަށް އިތުރަށް އިންވެސްޓްކޮށް ކުރިއެރުވުމަކީ މުހިންމު ކަންކަން ކަމުގައި ވަޒީރު ފާހަގަކުރެއްވިއެވެ.

މީގެ އިތުރުން، ކުޅިވަރު ކުޅުންތެރިންގެ މެޑިކަލް އަދި އިންޝުއަރެންސްގެ ކަންތައްތަކަކީ ވެސް ފާހަގަކުރެވޭ މުހިންމު ކަންކަން ކަމަށާއި މި ކަންކަމާ ގުޅޭގޮތުން ކުޅިވަރުގެ ދާއިރާގެ ބޭފުޅުންނާއެކު މަޝްވަރާކުރައްވާފައިވާ ކަމަށް ވެސް ވަޒީރު ވިދާޅުވިއެވެ.

ވަޒީރުކަމުގެ މަޤާމަށް އައްޔަންކުރެވުނު އިރު، އެ ފުރުޞަތަކީ ކުރިން އަޑުއުފުލި ކަންތައްތައް ޙަޤީޤަތަކަށް ހެއްދެވުމަށް ލިބުނު ފުރުޞަތެއްގެ ގޮތުގައި ދެކެވަޑައިގަންނަވާ ކަމަށް ވަޒީރު ވިދާޅުވިއެވެ. އަދި ވަޒީރުކަމުގެ މަޤާމާ ހަވާލުވެވަޑައިގެން، ކުޅިވަރުގެ ދާއިރާގައި ހުރި މައްސަލަތައް ހައްލުކުރުމަށް ކުޅުންތެރިންނާއި އެސޯސިއޭޝަންތަކާއި ވަރަށް ގާތުން މަސައްކަތްކުރައްވަމުން ގެންދަވާ ކަމަށް ވެސް ވަޒީރު ފާހަގަކުރެއްވިއެވެ.      

TelegramTwitterYoutubeTiktokViberFacebookInstagram

0 ރިއެކްޝަންސް / 0 ކޮމެންޓް

0%
0%
0%
0%
0%