އުޅަނދު އުފެއްދި ދުވަހުން ފެށިގެން ރަޖިސްޓްރީކުރަން ޖެހޭ އުމުރު ނުވަތަ މުއްދަތު މިދިޔަ އަހަރުގެ ނިޔަލަށް ހަމަވެފައިވާ ހަތަރު ފުރޮޅުލީ އުޅަނދުތައް ރަޖިސްޓްރީކުރަން އިތުރު މުއްދަތެއް ޓްރާންސްޕޯޓް މިނިސްޓްރީން މިއަދު ދީފިއެވެ.
ޓްރާންސްޕޯޓް މިނިސްޓްރީން ކުރި އިޢުލާނެއްގައި ބުނީ މިދިޔަ އަހަރުގެ ނިޔަލަށް ރާއްޖެއަށް އެތެރެކޮށްފައިވާ ހަތަރު ފުރޮޅުލީ އެއްގަމު އުޅަނދުތަކުގެ ތެރެއިން، ރަޖިސްޓަރީ ކުރުމަށް ކަނޑައަޅާފައިވާ އުމުރު ހަމަވެފައިވާ އުޅަނދުތަކުގެ ތެރެއިން ރަޖިސްޓްރީ ނުކޮށް ހުރި އުޅަނދުތައް ރަޖިސްޓްރީކުރަން އިތުރު މުއްދަތެއް ދޭން ނިންމާފައިވާ ކަމަށެވެ.
އެ ކަހަލަ އުޅަނދުތައް ރަޖިސްޓްރީކުރުމަށް ހަ ދުވަހުގެ މުއްދަތެއް ދިންއިރު، އެ މުއްދަތު ހަމަވާނީ އަންނަ ބުދަ ދުވަހަށެވެ.
އެ އުޅަނދުތައް ރަޖިސްޓަރީކުރުމަށް ބޭނުންވާ ލިޔެކިޔުންތަކާ އެކު، ޓްރާންސްޕޯޓް މިނިސްޓްރީގެ ޕޯޓަލް eportal.mta.gov.mv މެދުވެރިކޮށް ހުށަހެޅޭނެ މިނިސްޓްރީގެ އިޢުލާނުގައި ބުންޏެވެ.
އެއްގަމު އުޅަނދު ރަޖިސްޓަރީކުރުމުގެ ޤަވާޢިދުގައި ބުނެފައިވާ ގޮތުގައި، އިންޖީނުލީ އެއްގަމު އުޅަނދުތައް ރަޖިސްޓްރީކޮށްދެވޭނީ އެ އުޅަނދެއް އުފެއްދި އަހަރުން ފެށިގެން ވަކި މުއްދަތެއް ހަމަވެފައި ނުވާ ނަމައެވެ. އެގޮތުން އެކި ބާވަތުގެ ވެހިކަލްތަކަށް އެކި މުއްދަތު އެ ޤަވާޢިދުގައި ކަނޑައަޅާފައިވާއިރު، އެންމެ ގިނަވެގެން ލިބޭ މުއްދަތަކީ 15 އަހަރެވެ.
