ގޯލްޑް ކަޕުން ރައްޔިތުން ފުޓްބޯޅައަށް އޮތް ލޯބި ހާމަވެއްޖެ: ރާފިޢު

އާނާ ފަހީމް | 99 ދުވަސް ކުރިން - 13:51
ނައިންޓީ ޕްލަސް ގޯލްޑް ކަޕް ފައިނަލް މެޗްގައި ރައީސް އަދި ސަރުކާރުގެ އިސް ވަޒީރުން. / ފޮޓޯ: ރައީސް އޮފީސް
ނައިންޓީ ޕްލަސް ގޯލްޑް ކަޕް ފައިނަލް މެޗްގައި ރައީސް އަދި ސަރުކާރުގެ އިސް ވަޒީރުން. / ފޮޓޯ: ރައީސް އޮފީސް
ޚުލާސާ

ރަސްމީ ފުޓްބޯޅަ މުބާރާތްތައް އަލުން ފެށުމަށް ގޯލްޑް ކަޕް ފުޓުބޯޅަ މުބާރާތުން ހިތްވަރު ލިބި، މި މުބާރާތުން ރައްޔިތުންގެ މެދުގައި ފުޓްބޯޅައަށް އޮތް ލޯބި ހާމަވެގެންދިޔަ ކަމަށް ކުޅިވަރާބެހޭ ވަޒީރު ރާފިޢު ވިދާޅުވި.

ނިމިގެންދިޔަ ނައިންޓީ ޕްލަސް ގޯލްޑް ކަޕް ފުޓްބޯޅަ މުބާރާތަކީ ރަސްމީ ފުޓްބޯޅައިގެ ހަރަކާތްތައް އަލުން ފެށުމަށް ލިބިގެންދިޔަ ހިތްވަރެއް ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.

ވަޒީރު މިހެން ވިދާޅުވީ އަންގާރަ ދުވަހުގެރޭ ކުޅުނު ގޯލްޑް ކަޕުގެ ފައިނަލް މެޗަށްފަހު "ޕީއެސްއެމް ސްޕޯޓްސް" އަށް ދެއްވި އިންޓަވިއުއެއްގައެވެ.

ވަޒީރު ވިދާޅުވީ އަތޮޅުތެރޭގެ ރައްޔިތުންގެ މެދުގައި ފުޓްބޯޅައަށް އޮތް ލޯބި މި މުބާރާތުން ހާމަވެގެންދިޔަ ކަމަށެވެ. އަދި ރަސްމީ ފުޓްބޯޅަ މެޗެއް ވަރަށް ގިނަ ދުވަސްތަކަކަށްފަހު ކުޅެވިގެން ދިޔައިރު، އެ ފޯރި އަލުން ގެނެސް، ދަނޑު ފުރިގެންދިޔުމަކީ ލިބިގެންދިޔަ ވަރަށް ބޮޑު އުއްމީދެއް ކަމަށްވެސް ވިދާޅުވިއެވެ.

ވަޒީރު ވިދާޅުވީ ގަލޮޅު ރަސްމީ ބޯޅަ ދަނޑު މާރާމާތުކުރަން ޖެހޭ ކަމަށް ޤަބޫލުކުރައްވާ ކަމަށާއި، ދަނޑުގެ ޖާގައަށް ވުރެ އިތުރަށް މީހުން ދަނޑަށް ވަންނަށް ޑިމާންޑް ކުރުމަކީ ދަނޑު އިތުރަށް މަރާމާތުކޮށް، ތަރައްޤީކުރަން ޖެހޭ ސަބަބެއް ކަމަށެވެ. އަދި ރާއްޖޭގައި ފެންވަރު ރަނގަޅު އިތުރު ބޯޅަ ދަނޑެއް އޮންނަން ޖެހޭ ކަމަށާއި، އުއްމީދަކީ ހުޅުމާލެ ފޭސް އެކެއްގައި އެފަދަ ދަނޑެއް ޤާއިމުވެގެން ދިޔުން ކަމަށްވެސް ވިދާޅުވިއެވެ.

ވަޒީރު ވިދާޅުވީ މުބާރާތުން އެނގި ހާމަވެގެންދިޔައީ އުފާވެރިކަމާއި، އެކުވެރިކަމުގެ މާޙައުލަކުން ކުރިން ފުޓްބޯޅައިގެ އޮތް ފޯރި އަލުން އަނބުރާ އައުމުގެ މަންޒަރު ކަމަށެވެ. އަދި ރާއްޖޭގެ ކޮންމެ ހިސާބެއްގައި މިކަހަލަ މުބާރާތެއް ބޭއްވި ނަމަވެސް، ކުޅިވަރު ވުޒާރާގެ ފުރިހަމަ އެއްބާރުލުން ލިބިގެންދާނެ ކަމަށް ވަޒީރު ވިދާޅުވިއެވެ.

ރާއްޖޭގެ ފުރަތަމަ ޑިވިޝަނުގެ ކުލަބުތަކުގެ ހަރަކާތްތައް ހުއްޓިފައި އޮންނަތާ އަހަރަކަށް ވުރެ ގިނަ ދުވަސް ވެފައިވާއިރު، ސަރުކާރުން އަންނަނީ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އާއި ރާއްޖޭގެ ކުލަބުތަކާއެކު މަސައްކަތްކުރަމުންނެވެ. އެގޮތުން ވަޒީރު ވަނީ އިއްޔެ ރާއްޖޭގައި ފުރަތަމަ ޑިވިޝަންގައި ވާދަކުރާ ކުލަބުތަކާ ބައްދަލުކޮށް، ފުޓްބޯޅަ އަލުން ފެށުމަށް ވުޒާރާއިން ފޯރުކޮށްދެވޭނެ އެހީތެރިކަމާއި، މިހާރު ހުރި ދަތިތަކާ ގުޅޭ ގޮތުން މަޝްވަރާކުރައްވާފައެވެ.

"އަޅުގަނޑު އުއްމީދުކުރަނީ މުސްތަގުބަލުގައި މި ކަހަލަ މުބާރާތްތައް އަދި މިއަށްވުރެ މާ ފޯރިގަދަކޮށް އަޅުގަނޑުމެންނަށް ފެނިގެންދާނެ ކަމަށް." ވަޒީރު ވިދާޅުވިއެވެ.

TelegramTwitterYoutubeTiktokViberFacebookInstagram

0 ރިއެކްޝަންސް / 0 ކޮމެންޓް

0%
0%
0%
0%
0%